September 6, 2023 a neih tan ni hnih awh 'Two Day Workshop on Preventive & Curative Measures of Archival Records Along WIth The Latest Methods of Its Storage' chu vawiin September 7, 2023 khan neih chhunzawm a ni a. Records vawnhim dan leh bawlhlo hmanga siamthat dan a taka zirtirna neih a ni a, Workshop-a kalte hian anmahni kut ngeiin an tichhin bawk a ni. A taka inzirtirna (Practical) hi Pallab Rakshit, Conservator leh Azfar Ahmad, Project Head, The Heritage Consortium hoin neih a ni a. Record chhe tawh siamthatna atana bawlhlo ngaite leh a sawngbawl dante zirho a ni.

Chawhnu dar 3:30 khan Workshop kharna inkhawm neih a ni a; Pu Gen Khan Do, Jt. Director, Art & Culture Department chuan a kaihruai a, Pu Lalthansanga, Secretary, Art & Culture Department chu khuallian a ni.

Kharna inkhawmah hian The Heritage Consortium aiawhin Azfar Ahmad, Project Head chuan lawmthu a sawi a; Chemistry lama thiamna nei lem lo chunga theihtawp chhuaha Workshop chhimtuten thahnemngai taka an zir chu ropui a tih thu a sawi a, hmasawn zel tur leh hemi kawnga tan la zel turin a chah a; Workshop chhimtuten hlawkthlak an tih thu an sawi bawk.

Pu Lalmuanpuia, Archivist chuan Records vawnthat pawimawhnate sawiin he Workshop chhimtute chungah Mizoram State Archives leh Art & Culture Department hmngin lawmthu a sawi a. He Workshop hlawhtlin theihna atana sum leh tha sengtu The Heritage Consortium, Art & Culture Department, HDFC Bank leh Workshop chhimtu zawng zawngte chungah lawmthu a sawi.

Khuallian Pu Lalthansanga chuan Record vawnthat kawnga hma an lak chhoh zel thute sawi a; Department hrang hrangten Records Officer ruat chung changa hma an lak that tawk loh thin thu leh hemi kawnga hmalakna atan The Mizoram Public Records Act, 2011 chu siamthat (Amend) tuma hma lak a nih thu a sawi a; Workshop-a telte hnenah hian Certificate hlan nghal a ni.