Ni 26/8/2022 (Zirtawpni) zan dar 5:30-6:30 khan DDK Aizawl Station chuan Friday Live discussion hunah 'Record Vawnṭhat leh Mizoram Sorkar Dinhmun' tih thupui hmangin programme a buatsaih a. He hunah hian Pu F. Lalthanmawia Senior Research Officer, Tribal Research Institute, Pu Lalmuanpuia, Archivist, Mizoram State Archives leh Eva Lalrampari, Anchor ten hun an hmang a ni.
He programme-ah hian Mizoram sorkar record-te dahṭhatna tura Sorkarin a siam Mizoram State Archives ah record series gap thui tak a kim tawh loh thu leh a pawizia te uar takin sawiho a ni a. Mizoram sorkar hnuaia Department hrang hrangte chu record vawnthat kawngah an inthlahdah thu leh ṭan lak a ngaih tawh tak zet thu uar takin an sawi a. State Archives in an record kawl mek , a hlutna chhut chhuah rual loh te chu digitize hna an kal pui mek thu te sawiin an sum neih a tlem tham deuh avangin hna thawh zawh theih a ni ta lo va. Thawh chhunzawm ngei ngei ngai a nih si avangin remchang hmasaah sorkarin hna thawh zuina tur sum hi ngaihtuahsak thei se an duh tak zet thu an sawi bawk a ni.
Tin, Mizoram sorkar mai ni lo, NGOs emaw Pawl dang emaw mimal ang te pawhin Archives-ah hian record dah luh theih a nih thu an sawi bawk a. Amaherawhchu heng record Archives a dah luh turte erawh chuan Mizo mipuite emaw Mizo hnam tan, Mizoram tan hlutna an neih erawh angaih thu an tarlang bawk a ni.
Live Discussion hi en let duh tan Doordarshan Aizawl Youtube Channel-ah dah a ni.
