July 27, 2023 (Ningani) khan Records vawngthaa felfai taka thil chhinchhiah thlap thlap thin, Mizo pa ropui Pu C. Rokhuma (L), Padma Shri tu leh fate chuan an chenna in Mission venga Pu C. Rokhuma kut hnu leh a Records vawnthat tam takte chu him leh tha zawka enkawl a nih theihna turin Mizoram State Archives-ah an dah lut.

India zalenna kum 75-na lawmna pualin Mizoram Sawrkar pawhin Records pawimawh lakkhawm a rel a, hemi atan hian Archivist leh a Staff ten a hmunah kal chilhin an zu la a, enkawl zui dan leh vawnthat dan turte sawiho a ni bawk. Mizoram State Archives-ah hian miropui bik deuhte tan Private Archives siam a ni a. Hetah hian an kut hnu hrang hrangte dah khawm thin a ni. Pu C. Rokhuma pual hian Private Archives siam nghal niin a kut hnu tam takte hi zirmite tan thil tangkai tak turte a ni.