22^nd September, 2023 (Zirtawpni) khan Gov’t Aizawl College a BA Vth Semester zirlai mi 42 leh an zirtirtu pathum Dr.Zoremsiami Pachuau, Sydney Lalfakawmi leh Vanlalthlamuana ten Mizoram State Archives tlawhin Archives kalphung leh a hnathawhte an zir a; Zirlaite hi Pu Lalmuanpuia, Archivist chuan lo dawng sawngin Archives hnathawh dante lo hrilhfiahin a lo zirtir a ni. 

Pu Muanpuia chuan, “Mizote hian hnam anga dinchhuah kan duh tak tak a nih chuan kan record-te kan vawn that hi tih makmawh a ni” a ti. Tin, Mizoram Sorkarin Record vawnthat a ngaihpawimawh thute sawiin kum 2011 khan The Mizoram Public Records Act 2011 a lo siam tawh thute leh chu Act hnathawh theih nan chuan kum 2014 khan The Mizoram Public Records Rules, 2014 pawh siam a nih leh thute sawiin heng dan kan neihte hian Mizoram Sorkar hnuaia record te chu a huam vek thu leh he danin record enkawl dan tur a sawi ang chauha record-te chu enkawl tawh tur a nih thute uar takin a sawi a. He dan bawhchhia chu kum nga thlenga lung In tan emaw cheng singkhat chawitir emaw a pahnih emaw pawha hrem theih a nih thu te a sawi bawk.

Zirlai tam zawkte chuan Archives chu an la hriat ngai loh thu leh a nihna tak an hriat hnu chuan a hlutzia an hriat thute sawiin Archives tlawhna hun an hotute leh Mizoram State Archives hotuten an siam sak chu vannei an intihthu an sawi a. Archives chu Mizo mipuite tan hnam rohlu dahkhawmna hmunpui a lo nih reng avangin Zirlaite leh Zirtirtu zawng zawngten tlawh vek theih ni se an duh thu an sawi bawk a ni.

V^th Sem zirlaite hi an tam tham deuh avangin batch hnihah then an ni a, batch hnuhnung zawk chuan remchang hmasa berah Archives hi an la tlawh ve leh dawn a ni.