Ni 30.8.2022 leh Ni 7.9.2022 te khan UD&PA Department leh Sports & Youth Services Department ten Record an enkawl dan endik leh a tul anga thurawnte pe turin Pu Lalmuanpuia, Archivist leh Tv. C. Lalmuanpuia, Chemist-II te an thawkchhuak a. Ni 30.8.2022 a an tlawh UD&PA ah hian an Superintendent leh Deputy Director ten an lo dawng sawng a. Record vawnthat kawnga an hmalak dan te an lo hrilh a ni. Chutih laiin an thlen chin erawhin duhthu a sam loh thu te sawiin hmasawn an ngai hle a an hriat thu leh training te pawh an mamawh ngawih ngawih thu te an lo thlen bawk. Training chung chang hi sawi hovin remchang hmasa berah Department in ruahmanna lo siam se an ti a, Expert lam chu engtik lai pawhin an inpeih reng thute sawichhuah a ni bawk.
Ni 7.9.2022 a an tlawh Sports & youth Services Department pawhin record vawnthat kawngah hma nasa taka lak an tum mek thu an lo hrilh a. Departmental Record Room tur pawh an lo ruahman tawh thu an sawite chuan Archivist leh a team te a tilawm hle. Harsatna an tawh mek chung changte pawh an sawiho va, remchang hmasa berah Department a thawkte Training buatsaih ni se an ti bawk. Inspection team-te hi Department lam atangin Deputy Director leh Superintendent ten an lo dawng sawng a ni.
The Mizoram Public Records Act No 15 of 2011 Section 3(J) in thuneihna a pek angin Department te record vawnthat dan leh hmachhawp an neihte enpuiin Archivist leh a team te hi an thawk chhuak thin a. An ruahman dan chuan tun Financial Year chhung hian Mizoram Sawrkar hnuaia Department zawng zawng tlawh chhuah vek an tum a ni.
Record vawnthat kawngah Mizote kan hnufual em em a. Tuna Archives a record awm ho pawh hi hnamdang in Mizoram min awp laia min lo dahthatsak ho te kha an ni. UT kan nih hnua Mizoten Mizoram kan awp hnu a record te chu Archives ah hian hmuh tur a awm mumal reng reng lo a ni. A awmzia ah chuan Mizoram History hi thangthar ten rawn chhui dawn se, primary source chu UT kan nih hnu atanga tun thleng mai hian an hmu mang dawn lo tihna a ni a. Chumi awmzia chu UT kan nih atanga tun hun inkarah hian Mizoram hi a awm lo tihna a ni dawn ani. Hetiang hi kan dinhmun a nih avangin theih tawpa The Mizoram Public Records Act leh Rules te hi kalpui turin State Archives pawhin hma a la chho mek a. Hemi kawngah hian Department zawng zawngte thawhpuiah a sawm nghal bawk a ni.
